Татарстан Президенты һәм UIM башлыгы хезмәттәшлек турында фикер алышты
(Казан, 22 февраль, "Татар-информ"). Бүген Татарстан Президенты Рөстәм Миңнеханов Халыкара су-мотор спорты федерациясе (UIM) Президенты Рафаэль Кьюлли белән очрашты. Очрашу Татарстан Республикасы Хөкүмәте Йортында узды.
Рөстәм Миңнеханов һәм Рафаэль Кьюлли республиканың халыкара су-мотор спорты федерациясе белән алга таба хезмәттәшлекне үстерү, шулай ук Казанда UIM эгидасы астында ярышлар уздыру мөмкинлеге турында фикер алыштылар. Бу турыда Татарстан Президентының матбугат хезмәте хәбәр итте.
Татарстанның суда узышларны оештыру тәҗрибәсе бар. 2011 һәм 2012 елларда Казанда Түбән Кабан күле акваториясендә F1H2O классында катерларда узышу буенча дөнья чемпионаты этаплары узды. Гомумән алганда, ярышларның һәр этабында 60 меңнән артык кеше катнашты, диелә хәбәрдә.