Новости за 20.10.2023

د پاکستان دولتي راډیو پرون وویل چې پرون پنجشنبې د تورخم له لارې تر ۳ زره ډېر افغان کډوال خپل هېواد ته ستانه شول. د دې راډیو پر اساس، هره ورځ زرګونه افغان کډوال، چې په پاکستان کې د اوسېدو قانوني اسناد نه لري، په خپله خوښه افغانستان ته ستنېږي. د دې راډیو د راپور پر اساس، له کله چې له بې اسناده کډوالو غوښتل شوي چې له پاکستانه ووځي، تراوسه پورې تر ۴۸ زره ۵۰۰ ډېر افغانان خپل هېواد ته بېرته تللي دي. پاکستان بې اسناده کډوالو ته ویلي چې د اکټوبر تر ۳۱ پورې ووځي ګنې نیول کېږي او په زوره ایستل کېږي.

اینډیپینډینټ: اینډیپینډینټ ورځپاڼې په افغانستان کې د زلزله ځپلو د اساسي اړتیاوو په هکله یو مطلب خپور کړی دی. ورځپاڼه د خوړو د نړیوال سازمان د رپوټ په استناد لیکي چې د افغانستان په لوېدیځ کې له څو پرله‌پسې زلزلو وروسته د خلکو لپاره د خوړو د تیارولو لپاره ۱۹ میلیونو ډالرو ته چټکه اړتیا ده. د خوړو نړیوال سازمان د چهارشنبې په ورځ وویل دغو زلزلو لسګونه زره کسانو ته زیان اړولی دی. اینډیپینډینټ په افغانستان کې د دغه سازمان د مرستیالې ریسې انا ماریا سالهاونا له قوله لیکي چې دوی مالي بودیجې ته بېړنۍ اړتیا لري. Читать дальше...

د روغتیا نړیوال سازمان په هرات ولایت کې له څه باندې یولک زلزله ځپلو سره د نږدې ۸ میلیون ډالره مرستې غوښتنه وکړه. د ملګرو ملتونو دې ادارې پرون پنجشنبې په یوه راپور کې ویلي چې په هرات ولایت کې ۱۱۴ زره زلزله ځپلي روغتیايي مرستو ته اړتیا لري. تر دې مخکې د خوړو نړیوال پروګرام ویلي وو چې د هرات ولایت د زلزله ځپلو لپاره ۱۹ میلیون ډالرو ته اړتیا ده. په هرات ولایت کې له دوو اوونیو راهیسې زلزلې کېږي. د ملګرو ملتونو له شمېرو سره سم، تر ۱۴۰۰ ډېر کسان په دې زلزلو کې مړه شوي او شاوخوا ۲ زره ژوبل شوي دي.

د روغتیا نړیوال سازمان وايي، په بشري مرستو بار ۵ لارۍ د مصر له رفح څخه غزې تړانګې ته د تګ لپاره چمتو دي. دې سازمان د اسراییل د دې اعلان هرکلی وکړ چې وايي د مرستو د رسېدو مخه به ونه نیسي. د روغتیا د نړیوال سازمان ريیس ټیډروس اډهانوم پرون خبریالانو ته وویل: "زموږ په لاریو کې بشري مرستې بار شوي او چمتو دي چې غزې ته روانې شي."