ملګرو ملتونو د افغانستان ملي ناخالصو عوایدو کې د ۲۰ سلنه کمي خبرداری ورکړ
د ملګرو ملتونو پراختیایي پروګرام (UNDP) د افغانستان په ملي ناخالصو عوایدو کې په راتلونکي یو کال کې د ۲۰ سلنه کمي د احتمال راپور ورکړی.
دې ادارې د افغانستان د ټولنیز-اقتصادي وضعیت په اړه په یو نوي راپور کې ویلي چې د افغانستان کورني ناخالص عواید به د ۲۰۲۰م کال له ۲۰ میلیارده امریکايي ډالرو څخه ۱۶ میلیارده ډالرو ته راکم شي.
د ملګرو ملتونو د پراختیایي پروګرام ادارې همدارنګه خبرداری ورکړی چې که بېړني اقدامات ونهشي، په راتلونکو کلونو کې به ممکن دا کمی ۳۰ سلنې یا ۱۴ میلیارده ډالرو ته ورسېږي.
یو اېن ډي پي په دې اړه په خپل راپور کې ویلي، د افغانستان اقتصادي اډانه له اوږدې مودې راهیسې د خپل نږدې ۴۰ ملیونه وګړو د ملاتړ توان نهلري.
د راپور په باور په افغانستان کې د سړي سر کلنی عواید په ۲۰۱۲ کال کې له ۶۵۰ امریکايي ډالرو څخه په ۲۰۲۰ کال کې ۵۰۰ امریکايي ډالرو ته راټیټ شوي او تمه کېږي چې په راتلونکي کال کې به په چټکۍ سره ۳۵۰ ډالرو ته راښکته شي.
د افغانستان په اړه د ملګرو ملتونو د پراختیايي پروګرام دا نوې ټولنیزه-اقتصادي ارزونه اټکل کوي چې د کار کولو څخه د ښځو منعه کول کولای شي د دې هېواد د ناخالصو عوایدو تر ۱ میلیارد ډالرو یا پنځه سلنې پورې د دې هېواد ملي اقتصاد ته زیان ورسوي.
په راپور کې پر چارواکو غږ شوی چې د زدهکړو او کار کولو د حقونو په شمول د افغان ښځو او نجونو حقونه وساتي.
د ملګرو ملتونو په دې راپور کې غوښتنه شوې چې د کورنیو ناخالصو عوایدو کې د راتلونکي زیان د کمېدو لپاره دې د ښځینه مرستندویه کارکوونکو څخه د محدودیتونو د لیرې کولو په شمول ټولې کورنۍ سرچینې فعالې کړی شي.
طالبان چې د خپل واک په لومړیو څو میاشتو کې د زیاتېدونکې بېوزلۍ، لوږې او اقتصادي بحران سره مخ دي تر اوسهیې له کوره بهر د ښځو پر کار کولو محدویتونه پر ځای ساتلي او په ډېرو ولایتونو کې له شپږم ټولګي پورته د نجونو ښوونځي یې هم تړلي دي.