یونیسف: کندهار کې د خوارځواکو ماشومانو د ملاتړ په چارو بوخت یو
یونیسف ویلي، افغانستان کې له پنځو کلونو کشر یو میلیون ماشومان د شدیدې خوارځواکۍ له خطر سره مخامخ دي.
د دغې ادارې د افغانستان څانګې نن پر خپله ټویټرپاڼه لیکلي چې دوی په لېرې پرتو سیمو کې د دغو ماشومانو د ژغورنې پر چارو لګیا دي.
له دې وړاندې کابل کې د اندراګاندي یا د ماشومانو د صحت روغتون مشر ازادي راډیو ته ویلي و چې روغتون ته د تېرو کلونو پرتله ډېر خوارځواکي ماشومان ور وړل کېږي.