د شيعهګانو ځيني استازي: طالبان دې شيعه مذهب په رسمیت وپېژني
په افغانستان کې مېشت اهل تشیع له طالبانو د تشیع مذهب په رسمیت پېژندل او د اهل تشیع د شخصیه احوالو د تطبیق لپاره د ځانګړو محاکمو د جوړولو غوښتنه کړې.
د ټولو مذهبونو د پیروانو په ګډون د یو ټولشموله اسلامي نظام جوړول او بېلابېلو سیمو کې اړمنو ته د مرستو رسول د افغانستان د اهل تشیع اوسېدونکو نورې اساسي غوښتنې دي چې تازه د یو شمېر افغان شیعهګانو لهخوا مطرح شوې دي.
دوی په ټینګار سره وايي، تر کومه چې په افغانستان کې د اساسي قانون پر بنسټ یو ټولګډونه اسلامي نظام رامنځته کېږي د شیعهګانو استازي باید د هېواد په مهمو پرېکړو کې برخه ولري.
په افغانستان کې د اهل تشیع د علماوو شورا د دارالانشاء رئیس سید حسین عالمي بلخي له ازادي راډيو سره په خبرو کې وویل، یادې غوښتنې د اهل تشیع علماوو لهخوا په یوې جوړه شوې غونډه کې مطرح شوې دي.
ښاغلی بلخي زياتوي: "دغه غوښتنې او لیدلوري د افغانستان د اهل تشیع علماوو لهخوا د یوې ناستې په ترڅ کې مطرح شوې، په دې ناسته کې د ټولو ګوندونو، فرهنګي ټولنو او شوراګانو مسؤلینو ګډون درلود، د دې ټولو مسایلو په سر کې د اهل تشیع د مذهب په رسمیت پېژندل او د اهل تشیع د شخصیه احوالو قانون مطرح دی چې موږ باید د اهل تشیع د شخصيه احوالو د قانون د تطبیق لپاره جعفري محاکم ولرو."
ښاغلي بلخي وویل، دا ټولې غوښتنې د امتیاز اخیستنې په معنی نهدي، بلکې اهل تشیع د افغانستان شااوخوا ۱۰ ملیونه نفوس جوړوي.
د نوموړي په خبره، شیعهګانو دغه غوښتنې د طالبانو له حکومت نه د دوی د ستونزو د هوارۍ په خاطر کړي.
هغه اعلامیه چې د افغانستان د اهل تشیع علماوو شورا لهخوا د دوشنبې په ورځ د یوې ناستې پر مهال صادره شوې وه، پهکې ویل شوي و چې دوی تمه لري د خلکو او حکومتي چارواکو ترمنځ د خبرو اترو یوه سالمه فضا رامنځته شي او د ټولنې د نورو برخو نظریات هم پهکې په پام کې ونیول شي.
دوی ټینګار کړی چې د افغانستان په اوسنیو حالاتو کې تر کومه چې د اساسي قانون پر بنسټ یو ټولګډونه اسلامي نظام رامنځته کېږي د افغانستان د اهل تشیع قوم استازي دې د هېواد په مهمو پرېکړو کې ګډون ولري.
په اعلامیه کې دا هم ویل شوي چې د افغانستان اهل تشیع د سولې او ثبات، ملي یووالي، په سیاسي، اقتصادي، ټولنیزو، تعلیمي او تحصیلي برخو کې د ښځو د حقونو د ټينګښت او په افغانستان کې د اساسي قانون او د اسلامي نظام د رامنځته کېدو لپاره د ټولو مذاهبو نه جوړ د نخبهګانو د کمېسیون د جوړېدو غوښتونکي دي.
ازادي راډیو هڅه وکړه په دې اړه د طالبانو نظر هم واخلي، خو د طالبانو ویاند او دوه مرستیالانو د دې راپور تر خپرېدو پورې اړیکې ځواب نهکړې.
خو له دې وړاندې د طالبانو ویاند او د اطلاعاتو فرهنګ وزارت مرستیال ذبیحالله مجاهد او د بهرنیو چارو سیاسي مرستیال شېر محمد عباس ستانکزي د اهل تشیع په څو غونډو کې چې د کابل په لوېدیځ کې جوړې شوې وې برخه اخیستې وه.
ښاغلي مجاهد په یوې ناسته کې چې د جعفر مهدوي لهخوا د کابل په لوېدیځ کې جوړه شوې وه، د خپلې وینا پر مهال په یووالي ټینګار کړی و او ویلي یې و چې د افغانستان د اهل تشیع ټولې ګېلو او شکایتونو ته به رسېدنه کېږي.
د یادونې ده چې په افغانستان کې په شیعه مذهبي افغانانو ډېر ځله بریدونه هم شوي دي چې دا بریدونه هم په جمهوري نظام او هم اوس د طالبانو د واکمنۍ پر مهال و.
په دې بریدونو کې چې ډېری یې خونړي و او مرګژوبله یې درلوده، داعش ډلې یې مسؤلیت منلی دی.