طالبان: د داعش ډلې د بهرنيو اړيکو مالي مسؤل مو نيولی
طالبان د خوارجو اصطلاح د اسلامي دولت ډلې یا داعش د غړو لپاره کاروي.
په یوه بیان کې چې بېګا د استخباراتو پر رسمي ټویټر خپور شو ویل شوي چې د مالکي په مستعار نوم دې تورن کس د اوکرايین، جرمني او اسپانیا په ګډون له نورو هېوادونو څخه مالي مرستې د دوی په وینا د خوارجو ډلې ته راوړلې او د دې ډلې د جلب او جذب مسوول هم و.
طالبانو د دوحې په تړون کې له متحدو ایالتونو او نړیوالې ټولنې سره موافقه کړې وه چې د ترویستي ډلو فعالیت ته به اجازه نه ورکوي خو له تېر یوه کال راهیسې د دوی حکومت له دې تورونو سره مخامخ دی چې د القاعده شبکې په ګډون یې تروریستانو ته په افغانستان کې ځالې ورکړې دي.