پوتين نن د روسيې د ولسي جرګې او مشرانو جرګې تصويب شوې لايحه توشيح کړه
د روسیې ولسمشر ولادیمیر پوتین هغه سند لاسلیک کړ چې د اوکرايین څلور سیمې، خرسون، زاپروژیا، لوهانسک او دونیڅک له خپلې خاورې سره یو ځای کړي.
په ورته وخت کې پرون د امریکا د متحد ایالتونو ولسمشر جو بایډن د اوکرایين له جمهور رئیس ولودومیر زلنسکي سره په ټیلفون خبرې وکړې او له کییف سره یې د شپږ سوه پنځه ویشت میلیونه ډالرو په ارزښت د نویو پوځي مرستو ژمنه وکړه.
د دې مرستې له اعلان وروسته مسکو خبرداری ورکړ چې اوکرایين ته د نورو وسلو ورکړه د روسیې او لویدیځ ترمنځ د مخامخ جګړې خطر زیاتوي.
د اوکرايین ولسمشر ولودومیر زلنسکي د سې شنبې په شپه په خپله وینا کې وویل، ځواکونو یې د اوکرايین په جنوب کې پياوړی او سریع پرمختګ کړی دی او په لسګونو کلي یې روانه اوونۍ له روسي پوځیانو نیولي دي.
د اوکرايین ولسمشر څرګنده کړه چې یو شمېر سیمې یې په خرسون، لوهانسک او دونیڅک کې لاندې کړې دي.
زلنسکي زیاته کړه چې اوکرايیني ځواکونو په خرسون کې د ځوابي برید په ترڅ کې اته سیمې له روسیي پوځیانو نیولي دي.
د ولسمشر زلنسکي له ادعا سره په ورته وخت کې مسکو پرون یوه نقشه خپره کړه چې پهکې ښکارې چې روسیي پوځیان د خرسون له یو شمېر سیمو وتلي دي.
په دې نقشه کې د خارکیف په شمال ختیځ کې ښکارې چې روسیي پوځیانو د اوسکیل سیند غاړې یو مخ پرې ایښې دي.
د برېتانیا دفاع وزارت ویلي دي چې، د همدې سیند په اوږدو اوکرايیني پوځیان تر شل کیلومترو پورې وړاندې تللي دي.