اوکراین: ایران دې مسکو ته د وسلو له ورکولو ډډه وکړي
د اوکراین د بهرنیو چارو وزیر له خپل ایراني سیال سره په خبرو کې غوښتنه کړې چې تهران دې مسکو ته د وسلو له ورکولو ډډه وکړي.
دیمیتري کولیبا پرون د اکټوبر ۲۸مه پر ټوېټر له حسین امیر عبداللهیان سره د ټیلیفوني تماس خبر ورکړ او ویې لیکل، له روسیې سره پوځي مرستې چې د ده په وینا د ملکي وګړو په وژنه کې کار ترې اخیستل کېږي باید سمدستي بندې شي.
کییف او لوېدیځ متحدان یې پر روسیه تور لګوي چې د اوکراین په جګړه کې له ایراني بې پیلوټه الوتکو څخه کار اخلي.
متحدایالتونو، بریتانیا او اروپايي ټولنې د همدې موضوع له کبله پر ایران نور بندیزونه لګولي دي.