اروپايي ټولنه د ناګورنو قرهباغ اغېزمنو کسانو سره ۵ میلیونه مرسته کوي
د بشري مرستو او د بحرانونو د مدیریت لپاره د اروپايي ټولنې کمشنر یانیڅ لنارچیچ ویلي: "موږ باید د هغو زرګونو کسانو ملاتړ ته ځانونو چمتو کړو، چې له ناګورنو قره باغ یې د کډې کولو پرېکړه کړې ده."
لنارچیچ ویلي، داسې اټکل کېږي، رواروان ژمی به د دغو کډوالو لپاره نور چلنجونه او ستونزې هم پېښې کړي.
تېره اوونۍ هم اروپايي کمېسیون د پنځه سوه زره یورو په ارزښت د خپلې لومړۍ مرستې اعلان کړی.
بروکسل هیله من دی چې د دوی له مالي مرستې به ۲۵زره کسان ګټه واخلي چې یا په دې سیمه کې راګیر پاتې دي، یا هم ارمنستان ته کډه شوي دي.
په دې لانجمنه سیمه کې د ارمنستان او اذربایجان د پوځیانو ترمنځ له تېرې اوونۍ شخړې روانې دي او د ارمنستان حکومت ویلي تر پرون سې شنبه له دې سیمې ۱۳۳۵۰ تنه جبري بېځایه شوي کسان د ارمنستان خاورې ته ننوتي دي.