'صداقت کابل' لوبډلې د افغانستان فوټسال لیګ د دویم پړاو اتلولي وګټله
د پنجشنبې په ورځ د مارچ په ۹مه نېټه د افغانستان فوټبال فدراسیون په جمنازیوم کې صداقت کابل او پیروزي پنجشېر لوبډلو پایلوبه ترسره کړه چې ۵ـ۱ صداقت کابل وګټله.
صداقت کابل لوبډلې د سیالیو له پیله تر پایه هېڅ لوبه ونه بایلله.
دغه سیالۍ د افغانستان فوټبال فدراسیون له لوري د فبرورۍ میاشتې په ۱۵مه نېټه پیل شوې وې، د افغانستان د بېلابېلو سیمو لس استازو لوبډلو په کې برخه درلوده.
یاد فدراسیون ویلي وو چې د دې سیالیو غوره لوبغاړي به د افغانستان فوټسال ملي لوبډلو ته وټاکل شي.
د ویلو ده چې فوټسال سیالیو په افغانستان کې ډېر پرمختګ کړی او په روان کال کې به افغان لوبډله په بېلابېلو بهرنیو سیالیو کې ګډون وکړي.