اردن ته سفر؛ د امریکا د بهرنیو چارو وزیر په غزه کې د جګړې کمولو هڅه کوي
د امریکا د متحدو ایالتونو د بهرنیو چارو وزیر انتوني بلېنکن نن شنبه په اردن کې د عرب هېوادونو د بهرنیو چارو له وزیرانو سره د کتنو لړۍ پیل کړه.
بلېنکن هڅه کوي چې په غزه کې د څه کم یوې میاشتې روانې جګړې شدت کم شي.
دا وروسته له هغې چې اسراییل په جګړه کې د وقفې راوستلو لپاره د بلېنکن د غوښتنو په وړاندې مقاومت وښود.
د اسراییل پوځ اعلان وکړ، چې پلیو ځواکونو یې تېره شپه د غزې په جنوب کې پوځي عملیات کړي دي.
تر دې مخکې د فلسطین په محاصره شوي قلمرو کې د اسراییل د حملې له کبله د امبولانسونو یو کاروان او هغه ښوونځی په نښه شو، چې خلکو ورته پناه وړې وه.
په غزه کې روغتیايي چارواکي وايي، چې پر یوه امبولانس د اسراییل په هوايي حمله کې ۱۵ کسان وژل شوي دي.
خو د اسراییل پوځ بیا وايي، چې د حماس ډلې افراطي وسلوال یې په نښه کړي دي.
د حماس تر ولکې لاندې غزه کې روغتیايي چارواکو پرون جمعه ویلي اسراییل ، هغه امبولانس ویشتلی چې د ټپي شویو فلسطینیانو د لېږدولو په کاروان کې شامل و.
د غزې روغتیايي چارواکو په وینا په دې پېښه کې ۶۰ نور کسان ټپیان شوي دي.
د اسراییل پلیو ځواکونو تېره پنج شنبه د خپلو جنګي عملیاتو تر تشدید وروسته غزه ښار کلابند کړ.
د اسراییل په خبره هدف یې د حماس ډلې ختمول دي.
وروسته له هغې چې حماس ډلې د اکتوبر پر اوومه پر اسراییل په برید سره ۱۴۰۰ کسان ووژل او شا و خوا ۲۴۰ کسان یرغمل کړل، له هغې راهیسې پر غزه د اسراییل هوايي او ځمکني عملیات روان دي.
د حماس تر ولکې لاندې غزه کې روغتیا وزارت ویلي، چې د اسراییل په حملو کې تر اوسه تر ۹۲۰۰ زیات کسان، چې ډېره برخه یې ښځې او ماشومان دي، وژل شوي دي.