د افغانستان د کرکټ مینهوالو د ملي لوبډلې د ملاتړ لپاره کمپاین پيل کړی
د افغانستان د کرکټ مینهوالو د ملي لوبډلې له لوبغاړو د ملاتړ لپاره په خواله رسنیو یو کمپاین پيل کړی دی.
دا وروسته له هغه چې پرون د پاکستان کرکټ بورډ په خپله رسمي فېسبوک پاڼه د پاکستاني لوبغاړو یوه کمیډي ویډیو خپره کړه چې په کې د راشدخان د باولېنګ یا توپ اچونې په سټایل ملنډې وهي او خاندي.
د افغانستان کرکټ بورډ که څه هم مستقیماً په دې ویډیو او د پاکستان په لوبغاړو څه تبصره نه ده کړې، خو د راشدخان عکس یې خپور او د هغه کړنې یې ستایلي دي.
د خواله رسنیو افغان کاروونکو بیا د راشدخان او نورو افغان لوبغاړو زرګونه عکسونه او ویډیوګانې شریکې کړي او تر څنګ یې د پاکستاني کرکټرانو چلند غندلی دی.
دوی د 'موږ پر آبي پړانګانو ویاړو' په نوم یو هشټګ هم پيل کړی چې په ایکس او فېسبوکپاڼو لسګونه زره واره خپور شوی دی.
افغانان او د کرکټ مینهوال له ډېره وخته د افغانستان د کرکټ ملي لوبغاړي په بلوټایګرز یا آبي پړانګانو یادوي.