هغه دوه وروڼه چې غوښتل یې داعش سره د یو ځای کیدو لپاره افغانستان ته لاړشي!
۲۱ کلن محمد عبدالحلیم حیدر خان، او ۱۸ کلن محمد حمزه حیدر خان په جولای میاشت کې اعتراف کړی وو چې د تروریستي اعمالو لپاره یې تیاري نیوله.
دوی وروسته په برمنګم کې د محاکمې په مهال خپله خبره بېرته واخیسته، خو قاضي د جمعې په ورځ دواړه په قید محکوم کړل.
حلیم حیدرخان په لس کاله او کشر ورور یې په ۸ کاله بند محکوم شول. د دوی د قید موده څلور کاله زیاتېدای هم شي.
دوی قاضي ته وویل چې په ۲۰۲۲ کې افراطي افکار ورته پیدا شول او له داعش سره د یوځای کېدو لپاره یې د افغانستان د سفر پروګرام جوړ کړ. له دې ډلې سره د یوځای کېدو فورمې یې هم ډکې کړې وې.
دا دوه تنه د نوومبر په دوهمه په برمنګم کې په خپل کور کې ونیول شول.
بزنس ستنډرد
دې ورځپاڼې د افغانستان د روغتیايي سکتور د ملاتړ لپاره د اروپايي اتحادیې د مالي مرستې خبر ورکړی دی.
ورځپاڼه لیکي، په داسې وخت کې چې افغانستان له اقتصادي ستونزو سره لاس و ګرېوان دی اروپايي اتحادیې له ساري ناروغیو سره د مبارزې او د افغانستان د روغتیايی سیستم د ملاتړ لپاره د ۱۰ میلیون یورو د ورکولو ژمنه کړې ده.
دا پیسې به د روغتیا نړیوال سازمان ته ورکوي چې په افغانستان کې یې له ناروغیو سره پر مبارزې او د دغه هیواد د روغتیايي سیستم پر ملاتړ ولګوي.
دا مرسته په داسې وخت کې کېږي چې له ګاونډیو هېوادونو څخه لکونه افغانان بېرته افغانستان ته استول شوي او په ځانګړي ډول د هغو افغانانو په منځ کې چې له پاکستانه اېستل شوي، د نس ناستي په شان د ساري ناروغیو د خپرېدو په اړه اندېښنې زیاتې شوې دي.
د دې لپاره چې له پاکستان څخه اکثره اېستل شوي افغان کډوال په خپل هېواد کې سرپناه نه لري، ډېری یې په موقتي خیمو کې اړوي چې د تشناب او نظافت اسانتیاوې نه لري. له همدې کبله د دوی په منځ کې ناروغۍ په اسانه سرایت کوي.
د عربي هېواد عمان، ټایمز اف اومان (عمان) ورځپاڼې په افغانستان کې د کتابونو د پلورلو او چاپولو په اړه لیکنه خپره کړې ده.
ورځپاڼه لیکي، افغان کتاب پلورونکي او کتاب خپروونکي په خپل هیواد کې د کتاب د بازار پر سړېدو اندېښمن دي او وايي چې په تېرو دوو کلونو کې یې پنځوس سلنه مشتریان له لاسه ورکړي دي.
دوی دغه راز وايي چې لا هم د کتاب د پلور بازار په سړېدو دی ځکه چې د خلکو اقتصادي ستونزې ډېرې شوې دي.
په کابل کې د کتاب چاپوونکو اتحادیه وايي چې اوس په افغانستان کې ۱۸۰ کتاب خپروونکي، ۵۵۰ کتابپلورنځي او ۱۵۰ مطبعې فعالې دي خو ټولې له اقتصادي ستونزو سره مخامخ دي.