بښنې نړیوال سازمان: د جرمونو نړیواله محکمه دې په افغانستان کې د جنایتونو څېړلو ته لومړیتوب ورکړي
د بښني نړیوال سازمان د جرمونو د نړیوالې محکمې کلنۍ غونډې ته وړاندیز وکړ چې په افغانستان کې دې د ترسره شویو جرمونو څېړنې ته لومړیتوب ورکړي.
د بښني د نړیوال سازمان د جنوبي اسیا د برخې مسوول سمریتي سنګ وویل، په افغانستان کې له نژدې نیمې پېړۍ راهیسې د جرمونو په وړاندې له مجازاتو څخه د معافیت فرهنګ دود شوی دی او پروسږکال چې کله د جرمونو نړیوالې محکمې په دې برخه کې د تحقیقاتو د بیا پيلیدو خبر ورکړ، هیلې پيدا شوې چې د نړیوالو قوانینو په رڼا کې به عدالت تامین شي.
د جرمونو د نړیوالې محکمې کلنۍ غونډه روانه اونۍ دوشنبې په نیویارک کې پيل شوه چې د ډسمبر تر څوارلسمې به روانه وي.