محرابي: د افغانستان کنګل شوې شتمنۍ په اړه خبرې شوي
په سویس کې د افغانستان د پیسو د امانتي صندوق د بورډ یو غړی شاه محمد محرابي وایي، د افغانستان د کنګل شوې شتمنۍ په اړه خبرې شوي.
ښاغلی محرابي وايي، تېره میاشت یې د دوهم ځل لپاره د افغانستان د مرکزي بانک د کنګل شوې درې نیم ملیارډ ډالرو شتمنۍ په اړه چې، دغه صندوق یې چارې سمبالوي، پر مختلفو لارو خبرې وکړي چې، په څه ډول کېدای شي هغه د پولي ثبات سره سم ولګول شي.
دغه پیسې چې په امریکا کې د افغانستان بانک د کنګل شوې اووه ملیارډ ډالره شتمنۍ نیمایي برخه وه، تېر کال ازادې او دې امانتي صندوق ته ولېږدول شوې.
شاه محمد محرابي چې اوس هم د افغانستان بانک د عالي شورا غړی دی وویل، په هغه غونډه کې چې د دې بورډ څلورو غړیو په انلاین بڼه د فبرورۍ په ۱۶ ترسره کړه، د دغو پیسو د لګولو پر مختلفو لارو چارو خبرې وشوې.
هغه زیاته کړه، اساسي طرحه دا ده چې، د پولي ثبات لپاره د کومو لازمو اصولو لهمخې او د کومو بالقوه اهدافو لپاره د دغه امانتي صندوق پیسې لګول کېدای شي.
ښاغلي محرابي وویل، د ده په باور دغه پیسې به یوازې د پولي ثبات د ټینګښت او د افغانستان د اسعارو د نرخ د بېثباتۍ د کمولو لپاره ولګول شي.
د دغه امانتي صندوق غړیو ویلي، له کله چې دغه پیسې له ازادېدو وروسته د امریکا د مالیې وزارت یوه ځانګړي حساب او له هغه وروسته سویس ته انتقال شوي، تر اوسه یې اویا ملیون ډالره ګټه کړې ده.