روسیه کې د واګنر ملېشو بغاوت؛ برنز: امریکا په دې مسئله کې کوم رول نه لري
د امریکا د متحدو ایالتونو د مرکزي استخباراتو مشر ویلیم برنز د روسیې د استخباراتي ادارې له مشر سره په روسیه کې د تېرې اوونۍ د شنډ شوي بغاوت په باب خبرې وکړې.
هغه ویلي، چې په دې مسئله کې د امریکا متحد ایالتونه کوم رول نه لري.
نیویارک ټایمز او والسټریټ جورنال ورځپاڼو پرون راپور ورکړی، چې روسیې د بهرنیو استخباراتو د ادارې له مشر سرګي نارېشکین سره د برنز د روانې اوونۍ دغه خبرې په روسیه کې د بغاوت له هڅو وروسته په لوړه کچه لومړی تماس دی.
د روسیې د اجیرو سرتېرو د شرکت مشر یفګیني پریګوژین تېره اوونۍ د پوځي سرکشۍ د هڅې په رهبرۍ سره نړۍ ته ټکان ورکړ، خو کله چې یې جنګیالي مسکو ته نږدې شول، هغه د دې بغاوت د درېدو غوښتنه وکړه.
د پریګوژین تر مشرۍ لاندې واګنر شرکت په اوکراین کې د روسیې د جګړې په پرمخ بیولو کې مهم نقش لري.