د خوړو نړیوال سازمان: وسله والو مو یمن کې یو مسوول وژلی
د خوړو نړیوال پروګرام وايي، وسله والو کسانو په یمن کې د دې ادارې د یوه دفتر مسوول په ډزو وژلی دی.
ډبلیو اف پي پرون په یوه بیان کې وویل، چې د اردن تبعه محمد حمیدي په دې وروستیو کې یمن ته تللی و چې په تعز ښار کې کار پیل کړي.
تر اوسه معلومه نه ده، چې په دغه برید کې چا لاس درلود.
تعز چې د یمن دریم لوی ښار دی، له ۲۰۱۶ کال راهیسې د حوثي یاغیانو تر محاصرې لاندې دی.
د دغه ښار محاصرې د خلکو تګ راتګ سخت کړی او خلکو ته یې د اړتیا وړ توکو، درملو او بشري مرستو د لېږد مخه نیولې ده.