افغان کرکټ بورډ فرسټ کلاس سیالۍ پيلوي
د افغانستان کرکټ بورډ ادارې ویلي دي چې د کورنیو سیالیو په لړ کې به فرسټ کلاس ( څلور ورځنۍ) سیالۍ پيل کړي.
یادې ادارې په یوه خبرپاڼه کې لیکلي، چې دغه سیالۍ به د اګسټ په لسمه نېټه په ننګرهار او خوست ولایتونو کې پيل او د سپټمبر تر ۱۶مې نیټې به دوام وکړي.
په خبرپاڼه کې ویل شوي: "د احمدشاه ابدالي فرسټ کلاس څلور ورځنۍ سیالۍ چې له دې وړاندې د هېواد پنځو زونونو په استازیتوب پنځو لوبډلو پکې برخه درلوده، دا ځل به یې شپږم پړاو کې څلور لوبډلې: هندوکش سټرایکرز، ماهیپرستوري، میوند چمپینز او پامیر اتلان ګډون ولري."
کرکټ بورډ وايي، دا ځل یې د لوبډلو شمېر له پینځو څخه څلور ته راکم کړی دی او موخه یې دا ده څو ملي لوبغاړو ته د لوبو ښه زمینه سازي وشي.
د ویلو ده، چې د دې فرسټ کلاس سیالیو پر مهال به هره لوبډله یو د بل پر وړاندې دوه ـ دوه سیالۍ کوي او ټولټال به ۱۳ سیالۍ ترسره شي.