په نورستان کې د ځنګلونو اور؛ د خلکو شتمني سوځي
په نورستان ځنګلونو کې د تیرې یوې اونۍ راهېسې اور لګیدلی دی خو چارواکي او ولس یې لا هم په کابو کولو نه دي توانیدلي. د سېمې اوسیدونکي وايي تر اوسه په سلګونه جریبه ځمکه ولاړ ځنګل سوزیدلی او که لګیدلی اور کنټرول نه شي، نو د اور لمبې به د نورستان دواب او د لغمان د دولت شاه د ولسوالیو ځنګلونو ته پراخې شي. د نورستان چارواکو د اور لګیدو وروسته دوه ځلې ازادۍ راډیو ته وویل چې اور يې د ولس او طالبانو پر ګډو هڅو کنترول کړی، خو په سېمه کې وچه هوا، توند بادونه او د اور وژنې د وسایلو نشتون ددې اور د بیا تازه کیدو سبب شوي دي.