Алтынбек Сулайманов президенттин Ысык-Көлдөгү өкүлү болуп дайындалды
Президент Садыр Жапаровдун жарлыгына ылайык, Жогорку Кеңештин депутаты Алтынбек Сулайманов президенттин Ысык-Көл облусундагы ыйгарым укуктуу өкүлү болуп дайындалды. Мамлекет башчысы бүгүн, 24-февралда аны кабыл алды.
Жолугушууда "президент аймактын туристтик дараметин эске алуу менен анын мындан аркы социалдык-экономикалык өнүгүүсү боюнча бир катар конкреттүү тапшырмаларды койду”, - деп айтылат президенттин сайтындагы маалыматта.
Алтынбек Сулайманов, 49 жашта. Ноокат районунда туулган. Саясатка чейин "Темир" мамлекеттик ишканасынын түштүктөгү бөлүмүндө иштеген. 2007-жылы бийликчил “Ак жол” партиясынан депутат болгон. 2010-жылы Апрель ыңкылабынан соң “Республика” партиясына кирип, кайрадан парламентке келген. 2015-жылы өзү түптөгөн "Бир Бол" партиясы, 2021-жылы болсо “Альянс” партиясын жетектеп, Жогорку Кеңешке депутат болуп шайланган.
Соңку жылдары шайлоо системасын өркүндөтүү, парламенттик башкарууну бекемдөө боюнча бир катар демилгелер менен чыккан. (TSh)