طالبان: د افغانستان شمال کې د داعش یو"فعال" غړی نیول شوی
د طالبانو حکومت ادعا کوي چې د افغانستان په شمال کې يې د اسلامي دولت ډلې یا داعش یو "فعال" غړی نیولی دی.
د دوی د استخباراتو ځانګړو ځواکونو د یوې ویډیو په خپرولو سره دغه کس عین الدین یاد کړی چې، په وینا یې د بامیانو د سیغان ولسوالۍ اوسېدونکی دی.
د طالبانو استخباراتو د یکشنبې په ورځ (د اپریل دویمه) پر خپله ټویټرپاڼه لیکلي، دغه کس د بلخ پر والي محمد داود مزمل، مزار شریف کې پر تبیان فرهنګي مرکز، د سه دوکان په نوم د شیعه مذهبو پر یوه جومات، د ملکي کسانو پر یوه فلنګوچ ډوله موټر او د سمنګان مرکز ایبک کې پر یوې دیني مدرسې بریدونو کې لاس درلود.
د بلخ لپاره د طالبانو پر والي محمد داود مزمل د مارچ په نهمه د ولایت مقام دننه ځانمرګی برید وشو چې، نوموړی او څو نور ملګري يې پهکې ووژل شول.
هغه مهال د برید مسولیت داعش وسلهوالې ډلې ومانه.
تر دې برید دوه ورځې وروسته (د مارچ په ۱۱مه) په مزارشریف کې د تبیان په نوم فرهنګي مرکز کې د خبریالانو یوه غونډه کې چاودنه وشوه چې، لږ تر لږه درې کسان یې ووژل او ۱۵ نور یې ټپيان کړل.
پر دې بریدونو سربېره د طالبانو د استخباراتو په اعلامیه کې یاد شوي نور بریدونه هم، چې ویل کېږي نیول شوي کس پهکې لاس درلود، خونړي وو.
د طالبانو استخباراتو د نیول شوي کس اعترافونه هم خپاره کړي چې په نوموړی پهکې وایي، دوه نیم کاله وړاندې ایران کې د یوه کس لهخوا داعش ته جذب شوی دی.
معلومه نهده چې له نوموړي څخه دغه اعترافات په څه ډول شرایطو کې اخیستل شوي دي.
طالبانو نهدي ویلي چې د داعش دغه غړی یې په مشخص ډول څه وخت او چېرته نیولی دی، خو د نوموړي د نیولو عملیات یې پېچلي بللي دي.
تر دې وړاندې هم په کابل او یو شمېر نورو ولایتونو کې طالبانو د داعش پر پټنځایونو عملیات کړي او دوی دغه عملیات له لاسته راوړنو ډک بللي دي.
په دې وروستیو کې د افغانستان د سولې لپاره د امریکا پخواني ځانګړي استازي زلمي خلیلزاد هم لږ تر لږه دوه ځله د طالبانو دغه ډول عملیات وستایل او دا یې له ترهګرۍ سره د مبارزې په برخه کې د دوحې تړون د ژمنو عملي کول یاد کړي دي.
له کله چې طالبان په افغانستان کې واک ته رسېدلي، داعش ډلې پر بېلابېلو اهدافو خونړي بریدونه کړي دي.
تر ټولو تازه برید د تېرې اوونۍ د دوشنبې په ورځ کابل کې د بهرنیو چارو وزارت پر سړک وشو چې لږ تر لږه شپږ تنه پهکې ووژل شول او ۱۲ نور ټپيان شول.
د دغه برید مسولیت داعش وسلهوالې ډلې منلی دی.
تر دې وړاندې داعش پر همدې سړک د جنورۍ په ۱۱مه نېټه هم خونړی برید کړی و چې، په قربانیانو کې یې د بهرنیو چارو وزارت یو شمېر ډيپلوماتان شامل وو.
د ملګرو ملتونو د بندیزونو د ملاتړ او ارزونې تحلیلي کمېټې په خپل یو دېرشم نمبر راپور کې چې د ۲۰۲۳م کال دفبرورۍ په ۱۴مه خپور شوی ویلي، د اټکل لهمخې افغانستان کې د ۳۰۰۰ په شاوخوا کې داعش وسلهوال فعالیت لري.
طالبانو که څه هم په دومره شمېر کې د داعش موجودیت رد کړی، خو ویلې یې دي، د دغې ډلې جنګیالي له بهره افغانستان ته لېږدول شوي دي.