محمد نبي د 'ادې' په نوم د سرطان ناروغانو لپاره د درملنې مرکز جوړوي
د افغانستان کرکټ ملي لوبغاړي محمد نبي عیسي خېل پر خپل فېسبوک لیکلي چې راتلونکی پلان یې د سرطان یا کېنسر ناروغانو لپاره د درملنې د یوه مرکز پرانیستل دي.
عیسي خېل لیکلي: "دا ځل هڅه کوم چې خپل ملت ته یو لوی کار وکړم."
هغه دې روغتیایي مرکز ته د 'ادې' نوم ورکړی دی، خو د چارو د پیل نېټه یې نه ده په ډاګه کړې.
د ویلو ده چې له تېرو څو ورځو راهیسې پر ټولنیزو پاڼو یو شمېر خلکو د محمدنبي او راشدخان ترڅنګ له ګڼو نورو نوموتو افغانانو غوښتي چې د افغانستان دننه د سرطان ناروغانو ته یو مجهز روغتیایي مرکز جوړ کړي.
د یادونې ده چې د محمدنبي عیسی خېل ترڅنګ یو څو نور افغان لوبغاړي اوسمهال د خیریه ټولنو له لارې اړمنو افغانانو سره وخت ناوخت بېلابېلې مرستې هم کوي.