مارټين ګريفيټس: نړۍ دې افغانستان سره بشري مرستې ډېرې کړي
د ملګروملتونو د بشري مرستو د همغږۍ د ادارې مشر (مارټین ګریفیټس) له نړۍ غوښتي چې افغانستان سره د بشري مرستو په برخه کې خپلې مرستې ډېرې کړي.
سمیرا چې د کابل ښار په یوه څنډه کې ژوند کوي او د شپږو اولادو مور ده له ازادي راډیو سره یې په خبرو کې وویل، د ناسم اقتصادي وضعیت له امله د ژوند سختې شپې او ورځې تېروي.
د نوموړې په خبره د طالبانو له بیاځلي واکمنېدو راهیسې یې تر اوسه هیڅ ډول مرسته نهده ترلاسه کړې.
دا مېرمن وايي: "د کور ډوډۍ راوړونکې یوازې زه یم، د طالبانو له راتګ مخکې مې په یوې خیاطۍ کې کار کاوه، اوس د ګاونډیانو په کورونو کې پاک کاري او کالي مینځم، تر اوسه د هیڅ یو ارګان او مؤسسې نه له ما سره مرسته نهده شوې."
سميرا په افغانستان کې د هغو سلګونو او زرګونو کورنیو یوه بېلګه ده، چې له ناوړه اقتصادي وضعیت سره مخ او مرستو ته اړتیا لري.
دا په داسې حال کې ده، چې د ملګرو ملتونو د بشري مرستو د همغږۍ ادارې مشر (مارټین ګریفیټس) تازه د سهشنبې په ورځ په ایران کې د یوې خبري ناستې پر مهال د نړۍ له هېوادونو غوښتي، چې افغانستان سره خپلې مرستې زیاتې کړي.
ښاغلي ګریفیټس ویلي، دغه سازمان چې په افغانستان کې یې د ډېرو خلکو لاسنیوی کړی خو د ده په خبره، چې دا بسنه نهکوي.
نوموړي ويلي: "زه په ډېرې عاجزۍ سره د نړۍ له هېوادونو غواړم چې له موږ سره مرسته وکړي تر څو وشو کولای د افغانستان له خلکو سره بېړنۍ مرستې وکړو، سره له دې چې ډېری هېوادونو موږ سره د مرستو په برخه کې د چمتوالي اعلان کړی او تر دا مهال موږ توانېدلي یو چې نږ ۶ میلیارده ډالره د مرستو ژمنې ترلاسه کړو او دا یو لوی رقم دی، خو بیا هم په دې برخه کې د لازیاتو مرستو غوښتونکي یو."
ګریفیټس پر طالبانو غږ وکړ چې پر افغان مېرمنو لګول شوي بندیزونه لرې او خپل فرمانونه بېرته واخلي.
نوموړي په افغانستان کې د نړيوالو مؤسسو فعالیت مهم او په دې برخه کې یې د افغان مېرمنو ګډون حتمي یاد کړ.
ګریفیټس دا هم وویل، طالبان مسوولیت لري، چې د افغان ښځو او ماشومانو حقونه هغه که زدهکړې وي یا کار خوندي یې کړي.
نوموړي د افغانستان روانو حالاتو ته په اشارې سره وویل، نړيوالې ادارې له ښځو پرته په افغانستان کې اغېزناک فعالیتونه نهشي کولای او دا یوه روښانه خبره ده، چې د افغاني ټولنې ډېره زیانمنونکې برخه مېرمنې دي.
هڅه مو وکړه، چې د ښاغلي ګریفیټس د څرګندونو په اړه د طالبانو حکومت نظر هم واخلو خو د دوی ویاند ذبیحالله مجاهد د راپور تر خپرېدو پورې د ازادي راډیو پوښتنې ځواب نهکړې.
طالبانو په تېرو شاخوا ۱۷ میاشتو کې د خپلې واکمنۍ پر مهال پر افغان مېرمنو او نجونو بېلابېل بندیزونه لګولي دي، دوی نجونې له منځنیو ښوونځیو او پوهنتونونو راګرځولي او د ملګرو ملتونو د ادارو په ګډون یې په نا دولتي بهرنیو او هم کورنیو مؤسسو کې د ښځو پر کار بندیز لګولی دی.
دا بندیزونه په کور دننه او بهر په پراخه کچه غندل شوي، خو طالبانو یې په تړاو خپلې پرېکړې نه دي بدلې کړي.