Президент Жапаров Бакуда Гейдар Алиевди эскерди

Кыргызстандын президенти Садыр Жапаров 19-апрелде Баку шаарындагы “Ардак аллеяга” барып, Азербайжандын улуттук лидери Гейдар Алиевдин жана анын жубайы Зарифа Алиеванын мүрзөсүнө гүлчамбар койду.

Бул тууралуу мамлекет башчынын басма сөз кызматы кабарлады. 

Президент Садыр Жапаров расмий сапары менен Азербайжандын борбору Баку шаарына 19-апрелде барган.

Президенттин басма сөз кызматы маалымдагандай, эки күндүк сапар алкагында Жапаров Азербайжандын президенти Илхам Алиев менен эки тараптуу сүйлөшүүлөрдү өткөрөт. Мамлекет башчылары эки жана көп тараптуу кызматташуунун актуалдуу маселелерин талкуулашат.

Азербайжандын Милли Межлисинин төрайымы Сагиба Гафарова менен эки тараптуу жолугушуу да пландалган.

Мындан тышкары азербайжандык ишкер чөйрөнүн өкүлдөрү менен жолугушуп, Кыргызстан жана соода-инвестициялык чөйрөдөгү кызматташтыктын келечеги тууралуу маалымат берилет.

Сапар Кыргызстан менен Азербайжан ортосунда дипломатиялык мамилелердин түзүлгөндүгүнүн 30 жылдыгынын, мамлекеттер ортосундагы достук жана кызматташтык Келишимине кол коюлгандыгынын 25 жылдыгынын алдында өтөт. (КЕ)