БУУ тажик бийлигин "Памирдеги азчылыкты" коргоого чакырды
Бириккен Улуттар Уюмунун эксперттер тобу Тоолуу Бадахшан облусунда күчөгөң чыңалууга тынчсыздануусун билдирип, тажик бийлигин "Памирдеги азчылыкты" коргоого жана аймактагы адам укуктарын сактоого чакырды.
"Биз акцияларды күч менен басуу аракеттери, Памирдин тургундарын кармоо жана ашыкча, мыйзамсыз аскер күчүн колдонуу боюнча терең тынчсыздануубузду билдиребиз. Биз бийликти памирлик демонстранттарды басмырлоону токтотуу боюнча чараларды кабыл алууга чакырабыз", - деп жазылган БУУнун Адам укуктары боюнча башка комиссарынын сайтында.
Тажикстандын бийлиги азырынча буга комментарий бере элек. Мурдараак расмий Дүйшөмбү Тоолуу Бадахшандагы уюшкан кылмыштуу топтор менен күрөш жүрүп жатканын билдирген.
Хорогдогу кырдаал өткөн жылдын 25-ноябрында курчуп кеткен. Анда күч түзүмдөрүнүн операциясы маалында Гулбиддин Зиебеков аттуу жергиликтүү тургун өлтүрүлгөн. Буга байланыштуу Хорогдун жашоочулары төрт күн каршылык акциясына чыккан.
Алар бийлик Зиебековдун өлүмүн иликтөөнү, митингге чыккандарды куугунтуктабай турганын жана интернетти ачууну убада кылгандан кийин гана тарашкан. Азыр териштирүү иши жетиштүү түрдө жүрбөй жатат деп нааразы болуп жатышат.