Иманов 100дөн ашык паспортту өлкөдөн чыгарып бараткан адам кармалганын айтты

Кыргызстандын жарандарына таандык 100дөн ашык паспортту Түркияга чыгарып бараткан жаран кармалган. Бул тууралуу санариптик өнүгүү министри Талант Иманов "Азаттыкка" билдирди.

Анын айтуусунда, азыр Калкты жана жарандык абалдын актыларын каттоо мекемелеринде инвентаризация жүргүзүлүп жатат. Ош облусунун Өзгөн районун текшерүү учурунда жок кылына турган 1200 паспорт жетпей калган.

Учурда Улуттук коопсуздук комитети (УКМК) бул иш боюнча жети кишини камакка алган. Арасында мурда бул системада иштеп кеткен адамдар бар.

“Биз жарандарга айына 50-60 миң паспорт беребиз. Жылына 500-600 миң паспорт берилет. Эски системадагы жоготтум деп жаңы алганды өзгөртүш керек болуп жатат. Эски системада жоготтум деп коюп, башкаларга сатылган учурлар чыгып жатат. Азыр тергөө жүрүп жатат, көп нерсени айта албайм. Мунун артында көп кишинин катышы бар экен. Ош облусу боюнча жети киши камакта", - деди ал.

Иманов тергөөнүн кызыкчылыгы үчүн иштин жагдайларын ачыктай албай турганын, чет өлкөнүн жарандарына сатылышы мүмкүн деген документтер эски паспорттор экенин кошумчалады. УКМК маалымат берген жок.

Министр 25-апрелде паспорт берүү маселеси тууралуу билдирүү жасаган. Ал Фейсбуктагы баракчасына Калкты жана жарандык абалдын актыларды каттоо департаментинде паспорт мафиясы күчөгөнүн жазган.

Аталган департамент Санариптик өнүгүү министрлигинин алдындагы Мамлекеттик каттоо кызматына карайт. Мекеме акыркы билдирүүлөргө комментарий бере элек.

Кыргызстанда жасалма паспорттордун берилишине байланыштуу бир катар чуулгандуу окуялар катталган, козголгон кылмыш иштери эмне менен аяктаганы белгисиз учурлар көп болгон. (MTa)