Бишкекте тогуз айда менингококктун 26 учуру катталып, эки киши каза болду
Бишкек шаарында тогуз айда 26 бейтап менингококк инфекциясы менен катталып, эки бейтап каза болду. Бул тууралуу шаардык санитардык-эпидемиологиялык көзөмөлдөө борборунан кабарлашты. Маалыматка караганда, бейтаптардын 16сы 14 жашка чейинки балдар.
"Бейтаптардын абалынын оорлошунун себептеринин бири – дарыгерлерге кеч кайрылуу жана үй шартында өзүн-өзү дарылоо болгон. Менингит дене табынын жогорулашы менен башталат. Бейтаптын жакындары адам ооруп калган саатын так көрсөтө алышат. Бир-эки күндүн ичинде бейтапта катуу баш оору, кайра-кайра кусуу, эсин жоготуу, толкундануу симптомдору пайда болот. Башын артка таштап, буттарын ашказанга чейин тартат. Тамак-аштан уулануудан менингиттин айырмачылыгы – кусуу жеңилдик алып келбейт", - деп белгиленген аталган борбор тараткан маалыматта.
Дарыгерлер оорулуу дарыгерге канчалык тез кайрылса, ошончолук тез сакайып кетерин белгилешет.
Менингит ооруусу аба аркылуу да жугушу мүмкүн.
Менингит - мээ менен жүлүндүн кабыгынын сезгениши. Менингит өз алдынча илдет катары жана башка оорунун күчөп кетишинен да пайда болот. Анын бир түрүн менингококк бактериясы козгогондуктан, жугуштуу оору болуп саналат. (КЕ)