Түркия Сирия менен Ирактын түндүгүндө аба чабуулдарын баштады
Түркия Сирия менен Ирактын түндүгүндөгү күрт кошуундарынын позицияларын бутага алган аба чабуулдарын баштады. Бул тууралуу Түркиянын Коргоо министрлиги 20-ноябрда жарыялады.
Маалыматка ылайык, түрк аскердик учактары Түркияда террордук уюм деп эсептелген Күрд жумушчулар партиясынын (PKK) жана Сириядагы Элдик коргонуу кошуунунун (YPG) позицияларына сокку уруп жатат.
Түрк бийлиги "Чеңгел-Кылыч" деп аталган бул аскердик операциясын Бириккен Улуттар Уюмунун уставынын 51-беренесинин негизинде өзүн-өзү коргоо максатында өткөрүп жатканын билдирди.
Бул операция Стамбулда алты адамдын өмүрүн алган жардыруудан туура бир жума өткөндөн кийин башталды.
Түркиянын ички иштер министри Сулейман Сойлу 13-ноябрдагы жардыруу үчүн күрд жоочуларын күнөөлөгөн. Бирок күрд кошуундары бул окуяга тиешеси жок экенин билдиришкен. Стамбулдагы жардырууга байланыштуу 50гө жакын шектүү кармалган.