Ооруканалардагы тейлөөнүн сапатына нааразы болгондор министрликке кайрылды
Саламаттык сактоо министрлигинин коомдук кабылдамасына кайрылгандардын жарымынан көбү акысыз же арзандатылган дарыланууну суранганын мекеменин басма сөз кызматы билдирди.
Маалыматка караганда, 2022-жылдын 23-ноябрына чейин жалпы 300дөй киши коомдук кабылдамага кат түрүндө кайрылган. Алардын 50% арзандатылган же акысыз дарыланууну, дарыланууга каржылык жардам көрсөтүүнү сурангандар түзгөн. 30% мамлекеттик жана менчик ооруканаларда тейлөөнүн сапатсыздыгына арызданышкан. 20% жеңилдетүү менен берилген дарыларды сурап кайрылган.
Кыргызстанда мамлекеттик ооруканаларда дарылануу милдеттүү медициналык камсыздандыруу фондунун каржылоосу менен ишке ашат. 2021-жылдагы маалыматтар боюнча өлкөдө 126 стационардык оорукана, 1057 фельдшер-акушердик пункт, 686 үй-бүлөлүк дарыгерлер тобу, 61 жалпы дарыгерлердин практика борбору жана 17 үй-бүлөлүк медицина борбору бар.
Онкологиялык дарттар, туберкулез, ВИЧ/СПИД оорусу, өнөкөт бөйрөк жетишсиздиги сыяктуу дарттар акысыз дарылоо категориясына кирет.
Балдар, пенсионерлер жана кош бойлуу аялдарга жеңилдиктер каралган. (BCh)