Бир аптада Кыргызстанда 13 адам коронавируска кабылды
Саламаттык сактоо министрлигине караштуу Ооруларды алдын алуу жана мамлекеттик санитардык-эпидемиологиялык көзөмөл департаменти кабарлагандай, өткөн аптада 13 киши коронавирус инфекциясын жуктуруп алды.
Алардын экөө ооруканага жаткырылган, калган 11и үйүндө дарыланууда. 27-ноябрдан 4-декабрь аралыгындагы кырдаал эске алынып, Кыргызстандын бардык аймагы жашыл зонада калды. Өлкөдө эпидемиологиялык абал туруктуу деп бааланууда.
Расмий маалыматка караганда, Кыргызстанда вируска каршы вакцинанын биринчи дозасын 1 млн. 626 миң 630, экинчи дозасын 1 млн. 354 миң 203 адам алган.
2022-жылдын 10 айында өлкөдө 21 783 киши коронавируска кабылган.
Кыргызстанда 1-ноябрдан тарта коронавирус инфекциясына байланыштуу өзгөчө абал режими алынды.
Өзгөчө абал режими 2020-жылдын 22-мартында өлкөдө массалык оорулардын алдын алуу боюнча ыкчам чараларды көрүү максатында киргизилген. Ага чейин Дүйнөлүк саламаттык сактоо уюму коронавирус оорусун пандемия деп жарыялаган. (TAb)