Баткендеги өкүлчүлүк Тажикстан менен сүйлөшүүлөр жыйынтык бербей жатканын билдирди
Баткен облусунун ыйгарым укуктуу өкүлүнүн биринчи орун басары Маруфхан Тулаев кыргыз-тажик чек арасындагы соңку кырдаал боюнча “Кабар” маалымат агенттигине онлайн маалымат берди. Анда Тулаев эки өлкөнүн тийиштүү жетекчилеринин ок атышпоо жөнүндө макулдашуулары жыйынтык бербей жатканын маалымдады. Ал чек арага жакын аймактардагы тургундар коопсуз жайга көчүрүлгөнүн айтты.
“Баткен районун Самаркандек, Ак-Сай айыл өкмөттөрүндө кырдаал дагы эле курч. Макулдашууларга карабай тажик тараптан ок атуулар болууда", - деди ал.
Маруфхан Тулаев Ак-Сай айылы менен байланыш болбой жатканын кошумчалады. Андагы телефон жана электр жабдыктары талкаланган. Орун басардын айтымында, айылдагы мектеп боюнча интернетте тарап жаткан маалыматтарды тактоого мүмкүн болбой жатат.
Кыргыз-тажик чек арасындагы кырдаалга байланыштуу мамлекет башчы Садыр Жапаровдун төрагалыгы менен Коопсуздук кеңешинин жыйыны өтүп жатат. Бул тууралуу “Кабар” улуттук агентиги кабарлады. Ал жыйында бардык жогорку бийлик жана күч органдырынын жетекчилери катышууда.
Кыргызстандын Улуттук коопсуздук комитетинин (УКМК) Чек ара кызматы Баткендеги кыргыз-тажик чек арасында абал саат 18:30га карата чыңалган бойдон турганын маалымдады. Мекеме Тажикстан ок атышууну токтотуу тууралуу макулдашууну бузуп, Лейлектин Кулунду жана Жаңы Жердеги калктуу конуштарын кайрадан аткылап жатканын кабарлап, “тажик тарап Баткен районунда ракеталык системаны колдонду” деп айыптады. Азырынча Тажикстандын расмий органдары айыптоолорго жооп бере элек.
Кыргызстандын Саламаттык сактоо министрлиги Баткендеги кыргыз-тажик чек ара чатагында 15 жаштагы кыздын каза болгонун тастыктады. Башка каза болгондор боюнча маалымат такталып жатканы кабарланды. Министрлик саат 18:00гө карата чек арадагы куралдуу кагылышта жараат алгандардын саны 55ке жеткенин маалымдаган.
Кыргыз-тажик чек арасында 16-сентябрда эртең менен кайрадан ок атышуу башталган.
Кыргызстандын Чек ара кызматы “тажик тарап буга чейинки макулдашууларды бузуп, Кыргызстандын чек арасынын бүткүл периметри боюнча чек ара жана жарандык объектилерге чыккынчылык менен кол салды”, - деп кабарлаган.
Тажикстандагы “Ховар” маалымат агенттиги өлкөнүн Чек ара кызматына шилтеме кылып кыргыз чек арачылары таңкы саат төрттөн тартып “Дүйшөмбү” чек ара бекетин, айрым калктуу конуштарды аткылай баштаганын жазды.
Reuters агенттиги тажик тараптан бир жайкын тургун мерт болуп, дагы үч адам жараат алганын өз булактарына таянып билдирди. Тажик бийлиги расмий маалымат бере элек.
16-сентябрда Кыргызстандын президенти Садыр Жапаров менен Тажикстандын мамлекет башчысы Эмомали Рахмон чек арада ок атышууну токтотууну жана куралдуу күчтөрдү артка кайтарууну макулдашканы кабарланды. Эки өлкөнүн жетекчилери Өзбекстандын Самарканд шаарында өткөн Шанхай кызматташтык уюмунун (ШКУ) саммитинин аянтында жолугушкан.
Мунун алдында Улуттук коопсуздук комитеттин төрагасы Камчыбек Ташиев кыргыз-тажик чек арасындагы ок атышуу жөнүндө Тажикстандын күч түзүмдөрүнүн жетекчилери менен сүйлөшкөн. Ал атышуу 1-2 саатта толук бойдон токтотуларын билдирген.