کيف ته د جو بايډن ناڅاپي سفر؛ اوکراين سره د ملاتړ ژمنه يې کړې
د امریکا ولسمشر جو بایډن پر اوکراین د روسیې یرغل د یو کلنۍ په درشل کې کیف ته تللی دی.
کیف ته د بایډن له رسېدو سره سم د خطر زنګونه اورول شوي، خو خبري اژانسونو د کومې امنیتي پېښې خبر نهدی ورکړل شوی.
بایډن له خپل اوکرایني سیال سره تر لیدو کتو وروسته خبریالانو ته ویلي، د اوکراین خلک له سختو حالاتو تېریږي.
هغه زیاته کړې، د دې سفر پر مهال په دې خبرې کوي چې د جګړې د پای ته رسولو او بریا لپاره څه باید وکړي.
د بایډن په وینا دوی غواړی، اوکراین نور هم پیاوړی کړي او چمتو یې کړي چې سږ کال بریا ترلاسه کړي.
د ازادي راډیو د اوکرایني څانګې د راپور لهمخې، بایډن له روسیې سره په جګړه کې د اوکرایني پوځیانو مبارزه ستایلې او ویلې یې دي، اوکراین مرسته ورسره وکړه چې دوی د ډیموکراسۍ په معنا وپوهوي.
بایډن د اوکراین دولت ته د پنځه سوه میلیونه ډالرو په ارزښت د نویو پوځي مرستو ژمنه ورکړه او دغه راز یې وویل چې، د اوونۍ په پای کې به پر هغو روسیي شرکتونو نوي بندیزونه ولګوي چې د وسلو په صنعت کې ښکېل دي.
د بایډن په خبره، د نويو پوځي مرستو په چوکاټ کې به د هوایي سیستم د څارنې رادارونه او د هیمارس په نوم توغندیز سیستم اوکراین ته ورکړي.