د برېتانيا دفاع وزير: د افغانستان په اړه د شهزاده هري څرګندونو پوځ کې ځينې همکاران ناهيلي کړي
د برېتانیا دفاع وزیر بن والېس (Ben Walace) وايي، شهزاده هري د افغانستان په جګړه کې د وژلو کسانو د شمېر په افشا کولو په پوځ کې خپل همکاران ناهیلي کړي دي.
ښاغلي والېس (ایل بي سي) شبکې ته وویل، د وژلو کسانو پر شمېر ویاړ د پوځ اعمال ښه نه انځوروي.
ده زیاته کړه، په پوځ کې کار ټیمي یا ډلهییز وي نه دا چې څوک ډېرې ډزې وکړي.
شهزاده هري د خپلو خاطرو په کتاب کې، چې به وروستیو کې چاپ شو، لیکلي چې د ۲۵ طالبانو د وژلو په مهال یې د هغوی په اړه د شطرنج د دانو په شان فکر کاوه چې له تختې لېرې کېږي.
خو وروسته له دې چې په رسنیو کې د شهزاده هري په دې خبره تاوده بحثونه وشول، ده سي بي ایس ټلوېزیون ته وویل چې رسنیو د طالبانو د وژلو په باب د ده کتاب داسې منعکس کړی چې ګواکي ده د طالبانو پر وژلو ویاړ کړی دی.